Text Example of ᓀᐃᔭᐍᐏᐣ / Plains Cree (Y-Cree)

This text is pointed, meaning that it contains vowel length and the /h/ final. This page uses no characters outside the Unicode standard.

ᐁᑯᓯ ᒫᑲ ᐁᑎᑵ ᐊᓂᒪ ᑳᐃᑘᐟ ᐊᐘ ᐅᐢᑭᓃᑭᐤ, ᒥᔼᓯᐣ, ᑮᐢᐱᐣ ᑕᑲᑵᓂᓯᑐᐦᑕᒣᐠ ᐁᑿ ᒦᓇ ᑕᑲᑵᒥᑐᓂᐑᒋᐦᐃᓱᔦᐠ ᐊᓂᒪ, ᐆᒪ ᓀᐦᐃᔭᐍᐏᐣ ᑭᐢᐱᐣ ᑭᓄᐦᑌᑭᐢᑫᔨᐦᑌᓈᐚᐤ᙮ ᐆᒪ ᐆᑌ ᑳᐃᑕᐱᔮᕽ ᓵᐢᑿᑑᐣ, ᐁᑯᓯ ᐃᓯ ᐆᒪ ᓂᑲᑵᒋᒥᑲᐏᓈᐣ ᑮᑿᕀ ᐁᓅᐦᑌᑭᐢᑫᔨᐦᑕᐦᑭᐠ ᐁᑯᓯ ᐃᓯ ᐆᒪ, ᐹᐦᐯᔭᐠ ᐆᒥᓯ ᐃᓯ ᓂᑮᑭᑐᑎᑯᓈᓇᐠ, “ᑮᒁᕀ ᐊᓂᒪ ᐁᐘᑯ᙮ ᑖᓂᓯ ᐊᓂᒪ ᐁᐘᑯ ᐁᐃᑘᒪᑲᕽ ᐲᑭᐢᑵᐏᐣ᙮” ᐁᑯᓯ ᐃᑘᐘᐠ, ᐁᐘᑯ ᐊᓂᒪ ᐁᑲᑵᒋᒥᑯᔮᐦᑯᐠ, ᐁᑯᓯ ᐏᔭ ᐁᑭᐢᑫᔨᐦᑕᒫᕽ ᐊᓂᒪ, ᑮᒁᕀ ᑳᓅᐦᑌᑭᐢᑫᔨᐦᑕᐦᑭᐠ, ᐁᑯᓯ ᓂᑕᑎ ᐑᐦᑕᒪᐚᓈᓇᐠ, ᐁᑯᓯ ᐁᐃᓰᐦᒋᑫᔮᕽ ᐆᑌ ᓵᐢᑿᑑᐣ, ᐁᑿ ᐯᔭᑿᔭᐠ ᐊᓂᒪ ᐁᑯᓯ ᐃᓯ ᐆᒪ ᐁᐊᐱᔮᕽ, ᐁᑿ ᐯᔭᑿᔭᐠ ᒦᓇ ᐃᐦᑕᑯᐣ - ᑭᐢᑫᔨᐦᑕᒼ ᐊᐘ ᐊᓂᒪ ᐃᑕ ᒦᓇ ᐁᐊᐱᔮᕽ - ᐁᑯᑕ ᐱᓯᓯᐠ ᑫᐦᑌ ᐊᔭᐠ᙮ ᐁᑯᑕ ᐁᑿ ᐁᑯᓂᐠ ᑳᓂᑕᐍᔨᐦᑕᐦᑭᐠ, ᒣᒁᐨ ᐆᒪ ᐁᐘᑯ ᐆᒪ ᐁᑿ ᑳᓅᒋᐦᑖᒋᐠ, ᐁᑯᑕ ᐊᓂᒪ ᓂᐑᒋᐦᐃᐚᐣ᙮ 

ᓀᐦᐃᔭᐍᐏᐣ ᐁᑿ ᐁᐘᑯ, ᓇᒨᔭ ᐱᑯ ᐆᒪ ᑭᔮᓇᐤ ᐆᒪ ᑳᐃᓯᓀᐦᐃᔭᐍᔭᕽ, ᓇᒨᔭ ᐱᑯ ᐁᐘᑯ, ᓇᓈᑐᕽ ᐆᑭ ᐍᒌᑅᔮᓂᐘᐠ ᓇᐦᑲᐏᔨᓂᐘᐠ ᑇᑕᐠ, ᐅᐢᑳᔭᐠ ᐆᑭ ᒥᐢᑕᐦᐃ ᐁᐘᓂᐦᑖᒋᐠ ᐲᑭᐢᑵᐏᐣ, ᐁᑿ ᐆᑭ ᐁᐃᑘᒋᐠ ᓇᐦᑲᐏᔨᓂᐘᐠ ᐑᐢᑕᐚᐤ, ᒥᐦᒉᐟ ᐊᓂᑭ ᐅᐢᑳᔭᐠ ᓇᒨᔭ ᐁᐋᐸᒋᐦᑖᒋᐠ ᐊᓂᒪ ᓇᐦᑲᐍᐏᐣ, ᐑᐢᑕᐚᐤ ᐅᑎᓯ ᐲᑭᐢᑵᐏᓂᐚᐤ, ᐁᑯᓯ ᐁᑿ ᐊᓂᑭ ᑫᐦᑌ ᐊᔭᐠ ᓂᑕᐍᔨᐦᑕᒷᐠ ᐑᐢᑕᐚᐤ ᐅᑑᐢᑳᔨᒥᐚᐘ ᑕᐋᐸᒋᐦᑖᔨᐟ ᐊᓂᒪ ᐅᓇᐦᑲᐍᐏᓂᐚᐤ; ᓇᒨᔭ ᐑᐋᐸᒋᐦᑖᐘᐠ ᐁᐘᑯ ᐊᓂᒪ ᐅᐲᑭᐢᑵᐏᓂᐚᐤ ᐆᑭ ᐅᐢᑳᔭᐠ, ᐃᔮᔭᐤ ᐆᒪ ᐋᑲᔮᓰᒧᐏᐣ, ᐁᐘᑯ ᒥᐢᑕᐦᐃ ᓇᒨᔭ ᑲᑫᑎᕽ ᐊᔨᐚᐠ ᐋᐸᒋᐦᑖᐘᐠ᙮

ᓇᒨᔭ ᒦᓇ ᐁᐑᐃᑘᔮᕽ, ᐁᐸᒁᑕᒪᐚᔮᐦᑯᐠ ᐅᐢᑳᔭᐠ ᐆᒪ ᑳᐃᑕᑐᐢᑫᒋᐠ, ᐆᒪ ᑳᐋᑲᔮᓰᒧᒋᐠ, ᑖᐻ ᒥᐢᑕᐦᐃ ᒥᔼᓯᐣ ᐆᒪ, ᑳᐃᑕᑐᐢᑫᔦᐠ, ᐋᑲᔮᓰᒧᐏᐣ ᐆᒪ ᐅᐦᒋ ᒥᐢᑕᐦᐃ ᑭᒥᔪ ᐋᐸᒋᐦᑖᓈᐚᐤ, ᒋᑫᒫ ᓇᒨᔭ ᒥᔼᓯᐣ ᐁᑳ ᑕᐋᑲᔮᓰᒧᐟ ᐊᔨᓯᔨᓂᐤ - ᒫᒋᑯ ᓂᔭ ᐆᒪ, ᐄᐦ ᐁᓅᑐᑵᐏᔮᐣ, ᑌᐸᑯᐦᐱᒥᑕᓇᐤ ᐁᑿ ᐁᐊᑎᐃᑕᐦᑐᐱᐳᓀᔮᐣ, ᓇᒨᔭ ᐁᐅᐦᒋᐃᐢᑰᓬᐃᐏᔮᐣ, ᓇᒨᔭ ᐃᐢᑰᓬ ᐁᐅᐦᒋᐃᑐᐦᑌᔮᐣ, ᐁᐘᑯ ᐅᐦᒋ ᒥᑐᓂ ᓂᔭ ᓀᐦᐃᔭᐤ, ᓀᐦᐃᔭᐤ ᐃᐢᑵᐤ ᒥᑐᓂ ᓂᔭ, ᐁᐘᑯ ᐅᐦᒋ ᓂᑮᐅᑎᓂᑲᐏᐣ ᐊᓂᑕ ᓵᐢᑿᑑᐣ, ᐁᑯᑕ ᐊᓂᒪ, ᐁᑯᓯ ᐃᓯ ᐆᒪ ᑮᑿᕀ ᑕᐑᒋᐦᐊᑭᐠ ᐅᐢᑳᔭᐠ ᑕᐑᐦᑕᒪᐘᑭᐠ, ᐁᐘᑯ ᐆᒪ, ᐅᓵᒼ ᐁᓀᐦᐃᔭᐍᔮᐣ ᒥᑐᓂ, ᐁᑯᓯ ᐁᑿ, ᐁᑯᑕ ᐁᑿ ᐊᓂᒪ ᐁᑿ, ᐁᐘᑯ ᐆᒪ ᐁᑿ ᑕᑲᑵᑭᐢᑭᓄᐦᐊᒪᐘᑭᐠ ᐆᒪ ᓀᐦᐃᔭᐍᐏᐣ ᐆᑭ, ᐁᑿ, ᐁᐘᑯ ᐆᒪ ᐁᑿ ᑳᑭᐢᑭᓄᐦᐊᒫᓱᔦᐠ ᐆᒪ ᑳᐋᑲᔮᓰᒧᔦᐠ, ᒥᑐᓂ ᓇᐦᐃᔨᑯᕽ ᒥᔼᓯᐣ ᐁᐋᑲᔮᓰᒧᔦᐠ ᐁᑭᐢᑭᓄᐦᐊᒫᓱᔦᐠ, ᒫᑲ ᐁᑿ, ᐊᔭᐊᐱᐦᑕᐤ ᐃᔨᑯᕽ ᑖᐱᐢᑰᐨ ᑕᑮᐋᐸᒋᐦᑖᔦᐠ, ᑭᓀᐦᐃᔭᐚᓈᐚᐤ, ᐁᑯᓯ ᐁᑿ, ᑿᔭᐢᐠ ᐁᑿ ᐊᓂᑕ ᑕᑲᑵᐱᒥᐸᔨᐦᑖᔦᐠ ᐊᓂᒪ ᑳᓀᐦᐃᔭᐍᔦᐠ, ᐁᑳ ᑕᑲᑵᐴᓂᐦᑖᔦᐠ, ᐁᑳ ᑕᑲᑵᐘᓂᑭᐢᑭᓯᔦᐠ ᐊᓂᒪ ᑳᓀᐦᐃᔭᐍᔦᐠ᙮

ᐄᐦ ᓂᔭ, ᓇᒨᔭ ᐁᓂᐦᑖᐋᑲᔮᓰᒧᔮᐣ, ᑮᑕᐦᑕᐍ, ᒥᑐᓂ ᐃᑕ ᑳᐘᓊᐦᑳᑲᐏᔮᐣ, ᐱᑯ ᐁᐃᑘᐢᑕᒫᑲᐏᔮᐣ, ᐦᐋᐤ, ᐋᓴᕀ ᓂᔭ ᐁᑯᑕ ᓇᒨᔭ ᓂᑖᐸᒋᐦᑖᐣ ᐊᓂᒪ, ᐁᑳ ᐋᑲᔮᓰᒧᐏᐣ ᐁᐊᔮᔮᐣ, ᒥᐦᒋᐟ ᐁᑯᓯ ᐃᓯ ᓂᐑᑕᐱᒫᐘᐠ ᓀᑌ ᓵᐢᑿᑑᐣ, ᐁᐃᑘᐢᑕᒫᑲᐏᔮᐣ, ᐆᑭ ᑳᐋᑲᔮᓰᒧᒋᐠ ᐆᑭ, ᒥᐦᒉᐟ ᐊᐦᐴ ᒨᓂᔮᓴᐠ ᐁᑯᑕ ᐊᐱᐘᐠ, ᐁᑯᓂᐠ ᐁᑿ ᐊᓂᑭ, ᐱᑯ ᐁᑿ ᑕᐋᑲᔮᓰᒧᐏᐦᐟ ᐊᔨᐢᐠ, ᑕᑭᑐᑎᐦᒋᐠ, ᑖᓂᓯ ᐊᓂᒪ ᑳᐃᑘᔮᕽ ᐊᓂᒪ ᓂᔭᓈᐣ ᑳ ᓀᐦᐃᔭᐍᔮᕽ, ᐁᑿ ᐁᑿ ᐊᓂᑭ ᑕᓂᓯᑐᐦᑕᐦᑭᐠ ᒨᓂᔮᓴᐠ, ᒨᓂᔮᐢᑵᐘᐠ᙮

ᐁᑯᓯ ᐊᓂᒪ ᐊᔭ, ᐁᑯᓯ ᐁᑯᑌ ᐁᐃᓯᐱᒥᐸᔨᐠ, ᐁᑯᓯ ᒥᑐᓂ ᓂᑖᐦᑕᑲᐦᑫᔨᐦᑌᐣ ᐁᐘᑯ ᐆᒪ, ᑭᔮᒼ ᑭᑳᐦ ᓇᓈᐢᑯᒥᑎᓈᐚᐤ, ᑭᔮᒼ ᐁᑳ ᑕᑲᑵᐸᑭᒋᐍᐱᓇᒣᐠ ᑭᓀᐦᐃᔮᐏᐏᓂᓇᐤ, ᓀᐦᐃᔭᐍᐏᐣ, ᑭᔮᒼ ᐁᒪᒫᔩᔦᐠ ᐁᐲᑭᐢᑵᔦᐠ, ᐋᐦᒋ ᐱᑯ ᑕᑳᐦᑯᒌᔦᐠ ᐆᒥᓯ ᐃᓯ, ᑕᑲᑵᓀᐦᐃᔭᐏᐲᑭᐢᑵᔦᐠ ᓲᐢᒁᐨ, ᒥᑐᓂ ᒥᔼᓯᐣ, ᑖᐱᐢᑰᐨ ᓂᔭᓈᐣ ᐊᐘ ᓂᐑᒉᐚᑲᐣ ᐁᓅᑐᑵᐏᔮᕽ, ᓇᒨᔭ ᑲᑫᑎᕽ ᐋᓴᕀ, ᓂᒥᔰᔨᐦᑌᓈᐣ, ᐅᐢᑳᔭᐠ ᐅᐢᑭᐃᐢᑵᐤ ᑕᐯᓀᐦᐃᔭᐍᒧᑐᑖᑯᔮᕽ, ᒦᓇ ᐅᐢᑭᓃᑭᐤ - ᑲᓇᑫ ᓃᓱ ᐲᑭᐢᑵᐏᓇ ᑕᐋᐸᒋᐦᑖᐟ ᑕᓀᐦᐃᔭᐍᐟ, ᐋᓴᕀ ᒥᑐᓂ ᓂᒥᔪᒪᐦᒋᐦᐅᓈᐣ, ᑖᐱᐢᑰᐨ ᑿᔭᐢᐠ ᐁᓀᐦᐃᔭᐍᐟ ᓂᑎᑎᐦᑕᐚᐤ ᐅᐢᑭᓃᑭᐤ ᐅᐢᑭᓃᑭᐢᑵᐤ ᑳᐲᑭᐢᑵᐟ ᐁᑯᓯ ᐃᓯ ᑳᓀᐦᐃᔭᐍᐟ᙮ ᐁᐘᑯ ᐊᓂ ᐊᓂᒪ ᐯᔭᐠ, ᐁᑯᓯ ᓂᔭᓈᐣ ᐆᑌ ᐆᒪ ᑳᐃᓰᐦᒋᑫᔮᕽ ᓵᐢᑿᑑᐣ, ᑖᐦᑌᐱ ᐃᔨᑯᕽ ᑕᐊᐱᔮᕽ ᐆᒪᑐᐏᕽ, ᐁᑯᓯ ᐊᓂᒪ ᐁᐃᓯᑭᑐᑖᔮᐦᑯᐠ ᐅᐢᑳᔭᐠ᙮