This text is pointed, meaning that it contains vowel length, middle-of-the-word nasal finals, and the precononantal /h/. |
ᒐᐦᑳᐯᐦᐡ ᑲᔦ ᑎᐱᐦᑭᑮᓯᐦᐢᐌᐡᑲᐨ ᒦᓇ ᑭᐦᒋᐃᐦᑴ ᐁᔑᓂᐦᑳᓱᑯᐸᓀᐣ ᓅᐦᑯᒥᐦᐢ᙮ ᒦ ᑕᐦᐡ ᐅᑮᐊᔮᐙᑯᐸᐣ ᓈᐯᐣᓴᐣ ᐁᐃᔑᓂᐦᑳᓱᓂᑯᐸᓀᐣ ᒐᐦᑳᐯᐦᐡ᙮ ᒦ ᑕᐦᐡ ᐊᐦᐊ ᒐᐦᑳᐯᐦᐡ ᑮᒥᓄᑭ ᑲᔦ ᑮᒪᐡᑲᐎᓰ᙮ ᒦ ᑕᐦᐡ ᒦᓇ ᑲᔦ ᑮᓂᐦᑖᐸᐹᒥᐊᔮ ᐊᐦᐊ ᒐᐦᑳᐯᐦᐡ ᑲᔦ ᑕᐦᐡ ᑮᓂᐦᑖᒪᒦᐦᑭᐣᑎᓯ ᐊᐐᔭᐣ ᐃᑯ ᑲᔦ ᐊᐐᔮᔒᐦᔕᐣ ᑲᔦ ᐱᑯ ᓂᐲᐦᑳᐣᐠ ᑳᐊᔮᓂᐨ ᐁᑾ ᑲᔦ ᐊᓂᐦᔑᓈᐯ᙮ ᒦ ᐱᑯ ᑲᔦ ᑳᐃᔑᐗᓂᐦᐃᑳᓂᐗᑎᓂᐠ ᐁᑮᐃᔖᐨ, ᐁᑮᒪᒦᐦᑭᐣᒋᐦᑑᐨ ᐗᓂᐦᐃᑲᓂᓂ ᑲᔦ ᐱᑯ ᓇᒀᑲᓂᓂ᙮ ᐊᐦᐸᐣ ᐌᐣᑌᐣᑎᐨ ᑲᐯᑮᔑᐠ᙮ ᐹᓂᒫ ᐱᑯ ᐁᐋᒀᑎᐱᐦᑳᓂᐠ ᐁᐱᑮᐌᐨ᙮ ᒦᑕᐦᐡ ᐊᐦᐊ ᓅᐦᑯᒥᐦᐢ ᐁᑲᓅᓈᐨ, ᐋᓃᐣ ᑳᐃᔑᐦᒋᑫᔭᐣ ᒥᓂᑯᐦᐠ ᑳᑮᐃᓀᐣᑎᔭᐣ ᑲᐯᑮᔑᐠ᙮ ᒦ ᑕᐦᐡ ᐋᐦᐱᒋ ᐁᓈᐎᓈᑾᑎᓂᐠ ᐙᐦᓴ ᓅᐦᐱᒥᐣᐠ ᐁᐣᑖᐙᐨ ᓅᐦᑯᒥᐦᐢ ᑲᔦ ᒐᐦᑳᐯᐦᐡ᙮ ᒦ ᑕᐦᐡ ᑳᐃᓈᐨ ᓅᐦᑯᒥᐦᐢ ᒐᐦᑳᐯᐦᔕᐣ, ᒫᒑᐣ ᓈᓯᐲᐣ ᒋᓈᓯᐦᑲᒪᐣ ᓂᐱ ᐁᑳ ᑫᑰᐣ ᓂᐱ ᐁᐊᔮᔭᐣᐠ, ᐋᒫᐣ ᑭᑲᐡᑭᐦᑑᐣ ᒪᒥᐣᓯ ᐁᑑᑕᒪᐣ, ᐋᒫᐣ ᐃᑳ ᑭᑯᐦᑖᒋᐦᓰᐣ᙮ ᒦ ᑌᐺ ᑳᐃᔑᓈᓯᐲᓂᔕᐦᐙᑲᓂᐎᐨ ᒋᓈᑕᐦᐃᐲᐨ᙮ ᒦ ᑕᐦᐡ ᓅᐦᑯᒥᐦᐢ ᑳᐃᓈᐨ, ᒪᓈᑲᓇᐙᐸᒼ ᑎᐱᐦᑭᑮᓯᐦᐢ, ᑳᐎᐣ ᑲᔦ ᑲᓅᓈᐦᑫᐣ, ᐅᑮᐃᓈᐣ᙮ ᒦ ᑌᐺ ᑳᐃᔑᓈᓯᐲᐨ ᐁᑮᓈᑕᐦᐃᐲᐨ ᐅᑕᐦᑭᐦᑾᐣ ᐁᑕᐦᑯᓈᐨ᙮ ᐊᐦᐲ ᑌᐺ ᔐᒫᐠ ᐅᑮᑲᑲᓅᓈᐣ ᑎᐱᐦᑭᑮᓯᐦᓲᐣ ᑲᔦ ᐅᑮᒪᒦᐦᑭᐣᓱᒫᐣ ᑲᔦ ᐱᑯ ᐅᑮᐹᐦᐱᓄᐣᑕᐙᐣ᙮ ᒣᒀᐨ ᓈᓯᐲᐦᑲᓈᐣᐠ ᐅᐣᑕᐦᐃᐹᓂᐣᐠ ᒦ ᑳᐃᔑᐸᐹᑭᒫᐨ ᐃᓂ ᑎᐱᐦᑭᑮᓯᐦᓲᐣ᙮ ᐲᓂᐦᐡ ᑕᐦᐡ ᑮᐱᐯᐦᔓᓈᑯᓯ ᑎᐱᐦᑭᑮᓯᐦᐢ ᐁᑮᓂᐡᑭᒥᑯᐨ ᒐᐦᑳᐯᐦᔕᐣ᙮ ᒦ ᐦᓴ ᐊᐦᐸᐣ ᐁᑮᒪᓂᐱᓂᑯᐨ ᑎᐱᐦᑭᑮᓯᐦᓲᐣ, ᐊᓂᐦᐡ ᑳᐎᐣ ᐅᑮᓂᐦᑖᓅᐣᑕᐣᓰᐣ ᐋᓇᑮᐐᐣᑕᒪᐙᑲᓂᐎᐨ᙮ ᒦ ᑫᑲᐦᐲ ᓅᐦᑯᒥᐦᐢ ᐁᑸᓇᐎᐲᐦᐋᐨ ᐃᓂ ᒐᐦᑳᐯᐦᔕᐣ᙮ ᒦ ᐁᐦᑭᑐᐨ, ᐋᐣ ᐃᓈᑊ ᐁᐦᐲᐦᒋᑭᓄᐌᐣᐡᐅᐣᑌᐣᑎᐨ, ᓇᑕᐡᑳ ᐁᒪᒦᓬᐦᑭᐣᒋᐦᐋᑴᐣ ᑎᐱᐦᑭᑮᓯᐦᓲᐣ, ᐋᓇᑮᐅᐣᒋᐦᐊᑭᐸᐣ ᐁᑳᓬ ᒋᑑᑕᐣᐠ᙮ |
Home | Previous Page | Last Update: June 13, 2005 |