Text Example of ᐊᓂᐦᔑᓈᐯᒃ / Ojibwe (North West Dialect)

This text is pointed, meaning that it contains vowel length, glottal stops written as ᐞ, and the /h/ final.

ᒥᐦᑕᐦᑲᒥᑯᓐᒃ ᓂᐲᓐᒃ ᑲᔦ ᐃᔑᐦᓭ ᑮᐌᐱᓂᑳᑌᒃ ᐃᐞᐃ ᔔᓂᔮᐙᐳ᙮ ᒣᒀ ᑮᐅᔑᐦᒋᑳᑌᒃ ᑫᑰᓐ ᑖᐱᔥᑰ ᑮᐲᐙᐱᐦᑯᐦᑫᓈᓂᐗᓐᒃ ᒫᑭᔖ ᑲᔦ ᑮᒪᓯᓇᐞᐄᑭᓄᐦᑫᓈᓂᐗᓐᒃ ᐹᐦᑏᓋᔭᒃ ᑫᑰᓇᓐ ᐅᑖᐸᒋᐦᑑᓈᐙ ᐌᒥᐦᒋᑰᔑᐗᒃ ᑮᐅᔑᐦᑑᐙᑦ ᑫᑰᓐ᙮ ᐹᐦᑏᓋᔭᒃ ᑎᓅᐦᑳᓇᓐ ᐱᐦᒋᐴᐙᐴᓐ ᐅᑖᐸᒋᐦᑑᓈᐙ᙮ ᓃᐱᐗ ᑕᐦᔥ ᑫᑰᓐ ᐅᐌᐱᓈᓈᐙ ᑮᐃᔑᐦᒋᑫᐙᑦ᙮ ᐊᒦ ᑕᐦᔥ ᐃᒫ ᓂᐲᓐᒃ ᒥᐦᑕᐦᑲᒥᑯᓐᒃ ᑲᔦ ᐁᔑᐌᐱᓇᒧᐙᑦ ᐋᓅᒡ ᐃᑯ ᑫᑰᓐ᙮ ᓂᓐᑯᒋ ᐱᑯ ᓂᐦᔂᐦᒃ ᑕᐦᔂᐦᒃ ᒥᓂᑯᐦᒃ ᑎᐹᐲᔥᑰᒋᑲᓐ ᑮᐌᐱᓂᑳᑌ ᐃᐞᐃ ᔔᓂᔮᐙᐳ ᑳᐃᒋᑳᑌᒃ 1969 ᑮᐃᔑᐦᓭᒃ᙮ ᓃᔡᔭᑲᓐ ᐃᑕᐦᔥ ᐃᐞᐃ ᑎᓅᐦᑳᓐ ᔔᓂᔮᐙᐳ᙮ ᐯᔑᒃ ᐃᐞᐃ ᑎᓅᐦᑳᓐ ᓂᐦᑖᐋᐸᒋᐦᒋᑳᑌ ᒪᔥᑯᐦᓰᓐᒃ ᒋᐅᓐᒋᐗᓈᑕᐦᓯᓄᐦᑭᓐ ᐃᓂ ᒪᔥᑯᐦᓯᐗᓐ᙮ ᔖᑰᒡ ᐱᐦᒋᐳᓈᓂᐗᓐ ᑮᔥᐱᓐ ᐊᐎᔭ ᒦᒋᑦ ᐃᓂ ᓃᔡᔭᒃ ᔔᓂᔮᐙᐴᓐ᙮ ᑲᐃᔑᓃᔑᑭᓐ ᐱᑯ ᐱᐦᒋᐳᐌᒪᑲᓅᓐ᙮ ᑮᔥᐱᓐ ᑲᐯᔭᐞᐄ ᒦᒋᑦ ᐃᐌ ᓂᐦᑕᒻ ᔔᓂᔮᐙᐳ ᓇᓂᐦᔑᐦᑳᒡ ᐱᑯ ᐋᐦᑯᓯ, ᑮᒨᒡ ᐃᑯ ᐋᐦᑯᓯ᙮ ᓂᐦᑕᒻ ᑮᐌᐱᓂᑳᑌᒃ ᐃᐞᐃ ᔔᓂᔮᐙᐳ ᓂᐲᓐᒃ ᑳᐐᓐ ᓂᐦᑕᒻ ᐋᐦᐱᒋ ᓇᓃᓵᓀᓐᑖᑯᐦᓯᓅᓐ᙮ ᐹᒫ ᑕᐦᔥ ᑮᑰᔭᒃ ᑮᒦᒋᐙᑦ ᐃᐞᐃ ᔔᓂᔮᐙᐳ, ᐊᒦ ᐃᒫ ᑮᑰᔨᓐᒃ ᐁᔑᐊᓂᒪᔥᑲᐙᒃ ᐃᐌ ᔔᓂᔮᐙᐳ᙮ ᐊᒦ ᐃᒫ ᑮᑭᓂᑲᐎᔥᑳᒪᑲᐦᒃ ᐲᓐᒋᑮᑰᔨᓐᒃ ᐁᔑᐊᓂᓇᓃᓵᓇᑕᐦᒃ ᐃᐞᐃ ᔔᓂᔮᐙᐳ ᓇᐗᒡ ᐁᓲᓐᑲᐦᒃ ᒋᓂᐦᔑᐌᒪᑲᐦᒃ᙮ ᐲᓂᐦᔥ ᑕᐦᔥ ᑮᔥᐱᓐ ᐊᓂᐦᔑᓈᐯ ᐊᒸᑎᓐ ᐃᓂ ᑮᑰᔭᓐ, ᐊᒦ ᑫᐐᓐ ᐁᔑᐊᓂᒫᐗᒋᐦᑑᑦ ᐃᒫ ᐐᔭᐎᓐᒃ᙮ ᑳᐐᓐ ᑲᔦ ᑫᑰᓐ ᐊᐦᐳᑯᐦᓯᓅᓐ ᐃᐌ ᔔᓂᔮᐙᐳ᙮ ᑳᐐᓐ ᑭᐦᑫᓐᒋᑳᑌᐦᓯᓅᓐ ᑮᔥᐱᓐ ᑮᑰᔨᓐᒃ ᐁᐦᑌᑴᓐ ᐃᐌ ᔔᓂᔮᐙᐳ᙮ ᑮᔥᐱᓐ ᑕᐦᔥ ᑲᐯᔭᐞᐄ ᐊᒸᑲᓂᐎᑦ ᐊᐞᐊ ᑳᐱᐦᒋᐴᐎᑦ ᑮᑰᔾ ᐊᒦ ᐲᓂᐦᔥ ᐁᔑᐊᓂᐹᐦᑏᓇᑕᐦᒃ ᐃᐞᐃ ᐱᐦᒋᐳᐎᓐ, ᐃᐞᐃ ᔔᓂᔮᐙᐳ, ᐃᒫ ᐐᔭᐎᒫᓐᒃ, ᐃᒫ ᑲᔦ ᐐᔭᐎᒫᓐᒃ, ᒣᒥᓐᑕᑫ ᐱᑯ ᐅᑌᐞᐃᒫᓐᒃ, ᐅᓇᑭᔒᒫᓐᒃ, ᐅᐦᑯᓂᒫᓐᒃ, ᐅᑌᐦᑎᐦᑯᐦᓯᐎᒫᓐᒃ, ᐐᓂᓐᑎᐱᒫᓐᒃ ᐃᑕᐦᔥ ᑲᔦ᙮ ᑳᐐᓐ ᐋᐦᐱᒋ ᑾᔭᐦᒃ ᑭᐦᑫᓐᒋᑳᑌᐦᓯᓅᓐ ᑮᔥᐱᓐ ᐁᐦᑕ ᐅᑌᐦᑎᐦᑯᐦᓯᐎᒫ, ᔑᑭᐎᓐ ᐃᑕᐦᔥ ᑲᔦ, ᐊᓐᑐᑭᐦᑫᓐᒋᑳᑌᒃ᙮ ᑮᔥᐱᓐ ᑕᐦᔥ ᐐᓐ ᐅᐦᑯᓐ ᐐᓂᓯᐦᓯᒫ, ᔭᐞᐄ ᑕᐦᔥ ᒥᔅᑶ ᐊᓐᑐᑭᐦᑫᓐᒋᑳᑌᒃ, ᓇᐗᒡ ᐸᐯᓇᒃ ᐃᔑᐦᓭᒪᑲᓐ ᑫᑰᓐ ᒋᒥᐦᑭᑳᑌᑭᐸᓐ᙮